هامسەرۆکەو گرڎی دەم پارتی تولای حاتەم ئۆغوللاریە جە گلېرۊبیەو ئەنتەرناسیۆنالیست سۆسیالیستینە واتش: "ئی بانگەوازە پەی بەهێزکەردەی ئەوەکۊشاین کە بە دیدگاو سۆیسالیستی و ئەنتەرناسیۆنالیستیوە جە تورکیا و جەهانەنە ڕاوەبەر مکریۆ."
هامسەرۆکەو گرڎی دەم پارتی تولای حاتەم ئۆغوللاریە ئەستەنبوڵنە جە گلېرۊبیەو ئەنتەرناسیۆنالیست سۆسیالیستینە قسێش کەردۍ.
تولای حاتەم ئۆغوللاریە جە گلېرۊبیەکەینە سەرنجش وست سەرو 'بانگەوازو ئاشتی و گلېرگەی دیموکراتیک'ی ٢٧و شوباتو ڕابەر ئاپۆی و ئاماژەش پانەی دا ڕابەر ئاپۆ دەسنیشانش کەرڎەن ' تەنیا ڕاو چارەسەری دیموکراتیزەکەردەی تورکیایا.'
تولای جە بەردەوامیینە دەسنیشانش کەرڎ کە ڕابەر ئاپۆ واتەنش "پەنەوازا گرڎو ئا گەلو باوەڕدارییا جە تورکیانە مژیوا، بە تایبەت کورد سەرو بنەماو هاموڵاتیبیەی یەکسانی مافەکاشا بەدەس بارا.' جە بەردەوامینە واتیچش ڕابەر ئاپۆ جە دیدارەکا ئیمراڵیشەنە ئینەش واتەن: " ئی بانگەوازە پەی بەهێزکەردەی ئەوەکۊشاین کە بە دیدگاو سۆیسالیستی و ئەنتەرناسیۆنالیستیوە جە تورکیا و جەهانەنە ڕاوەبەر مکریۆ. هامکات بانگەوازو فاڕای گلېرگەیی و پێکئامایا."
قەرارو کۆنگرەو پەکەکەی
جە بەردەوامینە تولای حاتەم ئۆغوللاریە سەرنجش وست سەرو قەرارەکا کۆنگرەو ١٢ـەمینو پەکەکەی و جەختش چانەی کەرڎۆ قۆناغەکە پەی تورکیای و تەمامو هەرێمەکەی قۆناغێوە گرنگا. تولای حاتەم ئۆغوللاریە جەختش چانەی کەرڎۊ تەنیا بە دیموکراتیزەکەردەی تورکیای، دەرفەتو ڕزگاربیەی تورکیای جە قەیرانەکاش ڕەخسیۆ و چارەسەری کاریگەر وەڵۍ وزۆ و کاریگەریێوە ئەرێنی جە سیاسەتی مېیاننەتەویینە مارۊنە ئاراوە.
