ئوتامارانە ٢٠ـەمین فێستیڤاڵو نەریتی زاوڵا لواڕاوە
مېیانو گلېرۊبیەی ژەنا ئوتامارای کە جە هەرێمو ڕاینلاند-فاڵتسی ئەڵمانیای چالاکا، ئېساڵ ٢٠ـەمین فێستیڤاڵو نەریتی زاوڵاش بە دروشمۊو "نمەتاودۍ خیاڵەکاما دزدۍ" ئەنجامدا.
فێستیڤاڵەنە زاوڵۍ نەتەوە جیاوازەکا دەورو یۊیرە کوۍ بیێوە، هەم چێژشا هۊرگێرت و هەمیچ توانا کولتووری و هونەرییەکۍ ۋێشا نمایشکەردۍ.
فێستیڤاڵێوە جە سەیەو جەنگینە
فێستیڤاڵەکە شارو ئۆنکێلینە لواڕاوە. گوڵستان کانی ڕەشە نوێنەرەو ئوتامارای سەرەتا قسێش کەردۍ و ئەرەیاۋناش کە فێستڤاڵەکە جە کاتێنە ملۊڕاوە کە جەنگ و تنوتیژی جە ۋەرکۊتوو مېیامینینە ئینا ئارانە. کانی رەشە واتش: "ئێمە ئارۆ فێستیڤاڵ ڕاوەبەر مکەرمۍ، بەڵام جە ۋەرکۊتوو مېیامینینە بەهەزاران زاوڵۍ و ژەنی ڕووبەڕووو مەرگی و ماڵکاولی باوە، پېسە ژەنا ئوتامارای ماچمۍ: با ئی جەنگە دمایش پنە بۍ و ئیتر زاوڵۍ و ژەنی نەمرا."
ڕەنگە کولتوورییەکۍ و نمایشەکۍ سەرو شانۆی
جە چوارچێوەو فێستیڤاڵەکەینە زاوڵۍ بەرهەمەکاو هونەر، مۆسیقا و سەماشا سەرو شانۆیۆ نمایش کەرد. جە چالاکییەکەنە واردەی کوردەواری و ئەڵمانی پێشکەش بە مېمانەکا کریا. فێستیڤاڵەکە زاوڵۍ نەتەوە جیاوازەکاش جە دەورو ۋێش کوۍ کەردێبێنێوە، جە کەشێوە هەمە کولتورینە لواڕاوە.
گروپێوە سەماو زاوڵا جە شارو ترۆیزدۆرفی ئەڵمانیایۆ بەشداریشا جە فێستیڤاڵەکەینە کەرڎ و بە سەماو فۆلکلۆری و جلوبەرگی نەتەوەیی کوردیوە سەرنجو جەماوەریشا کێشت. ڕانیا ئالجیە کە فێستیڤاڵەکەی پێشکەش کەرۍ، بە کەمانچەکەیش جۆشو خرۆشێوە گۊرەش بە فێستڤاڵەکەی بەخشا.
