هەپەگە ئەرەیاۋناش جە کاتو ئەرەیاۋنای ئاېێربەسیوە تا ئیساتۍ هرووژمەکۍ سوپاو تورکی ئەرەگیری سەرەمڕە بەردەوامێنۍ و ئاماژەش پانەیچ دان هێزەکۍ سەر بە پەدەکەیچ جە هەوڵەکا گەمارۆدای، ڕا وستەیرەی و هەواڵگری پەی دۊڵەتو ئەرەگیرو تورکی درێژەش هەن.
مېیانو ئەرەیاۋنایی و چاپەمەنی هەپەگەی واتش: "چنی بانگەوازو ٢٧و شوباتو ڕابەر ئاپۆی جە کوردەسانەنە پرۆسېوە تازەو ستراتیجی دەسش پنەکەرڎ. تەڤگەرما پەی ئانەی ڕا پەی ئی پرۆسەیە بکەرۆوە و پەنەوازیەکاش بڕەخسنۆ جە ١و ئادارو ٢٠٢٥یوە ئاېێربەسش ئەرەیاۋنا. دووۍ مانگۍ سەرو ئی ئایېربەسەیرە موییەرۆ، کەچی هرووژمەکۍ سوپاو تورکی ئەرەگیری جە تەمامو کوردەسانینە بە ئەنجامدای ئۆپەراسیۆنی بەردەوامێنۍ و هرووژمە ئاسمانی و زەمینیەکۍ سەرو مېڎانوو هێزەکاما جە پانیشتوو کوردەسانینە نەمردنێنۍ."
هرووژمو کاسەلێسا جەنگی بەردەواما
ئەرەیاۋناکەو هەپەگەی پی جۊرە بەردەوام بی:
"جە هێڵۊو جوودی-دەهلەشنۆو زاپی تا بیاوۆ بە دەگاو بازیانی جە ۋەرنیشتوو مەتینای، جە مابەینو هێزەکاو گەریلایما و هیزەکاو دۊڵەتو تورکینە جە چنین نوقتێنە ڕووانە جەنگ قۆمیۆ. چا کاتایچەنە بە مەڵامەتو هرووژمەکاوە چڼین هەڤاڵېما گەشمەڕڎۍ بیۍ. دماین جار جە ١١و نیسانو ٢٠٢٥ینە جە کەشو جوودینە جە زاپ بە مەڵامەتوو هرووژمو چەکی کیمیاویی سوپاو تورکیوە هەڤاڵەکېما بەسێ تێکۆشینە (زەهرا زەلال ئاراز)ە و میترا کاتۆ (سارا عەسکەری)ە گەشمەرڎۍ بیۍ. ئاشکران دلۍ سوپا و تورکینە لایەنێوە کاسەڵێسو جەنگی بیەیش هەن کە گەرەکش نیا پرسو کوردی جە ڕاو سیاسیۆ چارەسەر بۆ، حەزش بە بەردەوامی جەنگیا، پۊکەی هرووژمەکۍ بەردەوامیشا هەن.
دلۍ پەدەکەیچەنە لایەنێوە پاڵپەشتی مکەرۆ
چی پرۆسە گرنگ و تاریخیەنە کە جە لاو ڕابەر ئاپۆیۆ دەسشپنەکریان، دلۍ هێزە سیاسییەکا کوردەسانینە پێگېوە پەشتیوانی و ئەرێنی ئاما ئاراوە، سەرو گرڎیۆ سەرکردە سیاسییەکۍ پانیشتوو کوردەسانی، وە چڼین کەسایەتیۍ سیاسیۍ پەشتیوانی ۋێشا بەربڕی. سەرەڕاو ئی ژیۋگە ئەرێنییەیچ هێزەکاو سەر بە پەدەکەی هیچکاتێ گەمارۆدای، ۋەربەس و بڕیەی ڕۍ و پنەدای زانیاری هەواڵگری پەی دۊڵەتو تورکی کەم نەکەردەنۆ و درێژەش پا هەرماناشە دان. بە تایبەت چی دووەمانگە ۋېیەردەنە لایەنێوە دلۍ پەدەکەی پاڵپەشتیش دان بە کاسە لێسی جەنگی، کۆمکووژی و دژمنا کوردی کە ویستشا درێژکەردەیۆ جەنگیا. ئاشکرا بی بە ۋەرفراوانی ئی هەوڵە ئینا ئارانە.
چا مېڎانەنە کە مانگۊو شوباتی دامە پەی هەمڕایاما نریارە و چنەشەنە هەمڕۍ فیداییما خەبات، عەگید و گۆران گەشمەرڎۍ بیۍ، جە مابەینو دەگایەکا گوهەرزی و بەلاڤەینە هێزەکاو پەدەکەی جە ٢٨و نیسانینە دەسشا بە وەشکەردەی بارەگېوە تازەی سەروازی کەردەن. ۋەرو پەیامە بەهێزەکاو سەرکردەکاشا پەی پەشتیوانی پرۆسەی تازەی، چەمەڕاو ئانەی بێنمۍ جە پراکتیکەنە هەڵوێسی ئەرێنی نیشانە بڎا، بەڵام پا هەڵوێستەیشا کە ڕاو بەینو زاپی و گارەیشا بڕی و هەوڵ مڎا بە تەمامی وزاشەرە و پاڵپەشتی پلانەو دلېنەبەردەی مکەرا، وستیمێش دلۍ نیگەرانیێوە جددییوە. وستەیرەو ئا خاڵە ستراتیجیۍ بەشێوەن جە پلانەو دلېنەبەردەی و گەمارۆدای کە جە دژو هێزەکاما ئەنجام مڎریۆ کە ماوەو چوارساڵان جە زاپەنە بە قارەمانیەتیوە ئینۍ مڎرامانەنە. فەرماندەییما چا مېڎانانە جە ٢٨ و ٢٩و نیسانینە، بە ئاگایی ئانەی زەرەرش چنە نەگنۆوە، جە ئاستێوە سوکەنە پەی هۆشیارکەردەیۆ دەسوەردایش کەرد.
بەهەمان شێوە جە دەگاو بێشیلیی مەتینایچ جە لایەنو هێزەکاو سەر بە پەدەکەیۆ جە خاڵێوەنە کە پەی مڎرامانوو هێزەکاما خاڵێوە ستراتییجیەنە، چا یاگێنە دەسشا بە وەشکەردەی بنکە و قەرەقۆلی سەروازی کەردەن. بە ڕۊشنی بەرگنۆ چا پەدەکە پێگەو ئاېێربەسو گەریلایش قۆستەنۆ، هەوڵمڎا هەنگام بە هەنگام گەمارۆ بڎا، ئینا چوارچێوەو پلانەو فەرماندەیی گرڎیی تورکینە پەی دلېنەبەردەی جماوە و گەرەکشانە گەریلای پەلکێشو دلۍ جەنگێوە ۋەرفراوانی و کاولکەری بکەرا.
چی قۆناغە تاریخیەنە کە پەی گەلی و تەڤگەریما قوناغو بریاردای ستراتیجییا، گەرەکما نیا چنی حیچ لایەنێوە گنمێنە دلۍ ئاڵۆزی و جەنگیوە. بە پێچەوانەو ئانەیۆ جە چوارچێوەو پرۆژەو ئاشتی و گلېرگەی دیموکراتیکی ڕابەر ئاپۆینە گەرەکمانە کێشەکەما بە گفتوگۆ چارەسەر بکەرمۍ. هێزەکۍ پەدەکەی کە هێزێوە کوردینۍ نمەبۆ بەشدارو پلانەو نەخێری بۆ، کە هیچ خزمەتێوە بە بەرژەوەندییەکا گەلو کوردی نمەکەرۆ و هەوڵ مڎۆ جوڵە و پێگەو هێزەکاما فاڕۆ و دلېشەنە بەرۆ. ئەر ئی هەرمانۍ جە جبەرو ئاگاڎاری ئیدارەو پەدەکەیۆ ئەنجام مڎریۆ، پەنەوازا ئیدارەو پەدەکەی دەسوەردای بکەرۆ، کە ئینا ئیسفاڎەو هێڵۊو نەژادپەرسی و کۆمکووژی دۊڵەتو تورکینە. ئەر ئی هەرمانۍ بە ئاگاڎاری ئیدارەو باڵاو پەدەکەی ئەنجام مڎریۆ، داواشا ۋنەمکەرمۍ دەسبەردارۍ ئی هەڵوێسەیە با کە خزمەت بە بەرژەوەندییە نەتەوەییەکا گەلو کوردی نمەکەرۆ و داوا جە هێزە کوردییە وڵاتپارێزنەکا و گەلەکەیما مکەرمۍ چی مژارەنە هۊشیارۍ با."
