هەڵمەتە و زیندانی کەردەی هاموڵاتییا کوردی جە وەرکەوتوو کوردەسانی جەلایەن و دۆڵەتو ئێرانیۆ بەردەواما، چا چوارچێوەنە هاموڵاتیێ خەڵکو مەهابادی زیندانیکریا و هەرپاسە هونەرمەندێوە خەڵکو ئیلامی سزا دریا.
ڕێکوزیا و جەمە و مافو مرۆڤو کوردەسانی ئەرەیاوناش؛ هاموڵاتییێ کورد بە نامێ وەهاب خەدیری پووری خەڵکو مەهابادی جە وەرکەوتوو کوردەسانی دماو خوڵقکەردەی پەی بەشو جابەجێ کەردە و سزاکا دادسەرای گرڏی و شۆڕشو شارەکەی باڵبەسکریا و ڕەوانەو زینانو شارەکەی کریا.
حەر جە هەواڵەکەنە ئامان؛ ئا هاموڵاتییە کوردە جە مانگە و نیسانو ئێساڵی جەلایەن و لقو یوەم و دادگاو شۆڕشو مەهابادیۆ بە تۆمەتو "بانگەشە دژ بە حکومەت" ی سزاو هەشت مانگا زینانی کەردەیش سەرەرە سەپیان و ئامان: " جە ٢٩ـو کانوونو دووەمی ٢٠٢٥، دماو خوڵقکەردەی پەی ئیدارەو ئیتلاعاتو مەهابادی بە بێ فەرمانو دادوەری باڵبەسکریا، دماتەر جە ١٩ـو مانگو شووباتو ئێساڵینە بە شێوەو کاتی ئازاد کریا."
ئاماژە پانەیە کریان؛ وەهاب خەدیری پوور مامۆزا و شەماڵ خەدیری پووریا، کە جە كاتو سەرهورداو شۆڕشو "ژەنی ژیوای ئازادیی" جەلایەنو هێزە ئەمنییەكا ئێرانی جە مەهابادەنە گەشمەرڏە کریان.
جە بەردەوامینە ڕێکوزیا و جەمە و مافو مرۆڤو کوردەسانی ئاماژەش بە سزادای هونەرمەندێوە کوردی کەردەن و ئامان: " هونەرمەند و ئاوازنیارێوە کوردی بە نامێ ئارمان شادیوەندی خەڵکو ناوچە و دەڕەشارو سەر بە پارێزگاو ئیلامی جە وەرکەوتوو کوردەسانی جە لایەن و لقو ٢ـی دادگاو شۆڕشو شارەکەی بە تۆمەتو” بێرێزیکەردەی بە ڕابەر و باڵاو ئێرانی” و ” پروپاگاندە دژو دەسەڵاتی” بە ٢٤ مانگێ زینانی کەردەی سزا دریا، هەرپاسە دایوەنە و٣٠قامچیاش سەرەرە سەپیان."
