ڕابەر ئاپۆ پەیامێوەش کیانا پەی مەراسیمو یاڎکەردەیۆ کادرا سەرمەشقۍ پەکەکەی عەلی حەیدەر قەیتانی و ڕەزا ئاڵتونی جە توزولچایر، جە پەیامەکەنە ماچۆ: "جە ئەوەکۊشای ئێمەنە پېسە ڕابەرێوە هەمیشەیی درێژە بە بیەو ۋێشا مڎا".
سەرو بناغەو بانگەوازو "ئاشتی و گلېرگەی دیموکراتیک"ـی ڕابەر ئاپۆی جە ٢٧ و شوباتینە، پەکەکە دوانزەهەمین کۆنگرەو ۋێش بینا و ئەرەیاۋناش کە کادرا سەرمەشقی عەلی حەیدەر قەیتان (فوئاد) و ڕەزا ئاڵتون گەشمەرڎۍ بیێنۍ. وچیا کە عەلی حەیدەر قەیتان جە ٣ ۍ تەمموزو ٢٠١٨، ڕەزا ئاڵتون جە ٢٥ و ئەیلوولو ٢٠١٩ ینە گەشمەرڎۍ بیێنۍ.
ڕابەر ئاپۆ دەربارەو کۆنگرەو پەکەکەی و گەشمەرڎەبیەو عەلی حەیدەر قەیتانی و ڕەزا ئاڵتونی، پەیامێوەش کیاست. پەیامەکەو ڕابەر ئاپۆی جە تەعزیەو عەلی حەیدەر قەیتانی و ڕەزا ئاڵتونینە جە توزولچایر ۋنریاوە. پەیامەکە جە لایەنو پارێزنەرو نووسینگەو یاسایی سەدەی، فایەق ئۆزگور ئەرۆلیۆ ۋنیاوە.
"هەڤاڵا ئېژای،
بە داخ و ئەسەفێوە فرۆ هەواڵو گەشمەرڎەبیەو عەلی حەیدەر قەیتانی و ڕەزا ئاڵتونیم ئەژنی.
دماتەر هۊرسەنگنایۍ ۋەرفراوان مکەرو پەی یاڎو ئی دووە هەڤاڵەیە، ئیساتۍ بە ڕێزێوە گۊرۆ یاڎشا مکەرووە.
ئاڎۍ هەمیشە جە ئەوەکۊشای بیەی نەتەوەیی و کۆمیوناڵیزمی دیموکراتیکینە یاگۍ گێرا.
ئاڎۍ هەمیشە دەورو ۋێشا گێڵنا پېسە بەهای بنەڕەتی و ئیلهامبەخشی پەی پارادایمی و ڕێکوستەی سەردەمی تازەی.
جە ئەوەکۊشای ئێمەنە پېسە ڕابەرێوە هەمیشەیی درێژە بە بیەو ۋێشا مڎا.
پی بۊنۆ، بەڕێزۆ سڵام ۋنەو قەرارەکا دوانزەهەمین کۆنگرەو تاریخی و پەیامەکا پېوەس بە ئایندەی مکەرو.
عەبدوڵا ئۆجالان
ئیمراڵی/بورسا
١٢_٥_٢٠٢٥".
