یەرۍ ساڵێن چارەنوویسو ئیدریس فەقیهی دیار نییا
ئیدریس فەقیهی جوانێوە کوردو خەڵکو سنەی، جە مانگۊو ئابو ٢٠٢١یوە دماو باڵبەسکەردەیش جە لایەنو هێزە ئەمنییەکا بۊکانیوە بێسەروشۊن کریان و حیچ زانیاریێوە سەرو چارەنوویسیش بە بنەیانەکەیش نمەڎریۆ.
ئیدریس فەقیهی، جوانێوە کوردی سوننە مەزهەبو خەڵکو سنەیا کە زیاتەر جە ٣ ساڵان چارەنوویسش دیار نییا و بەشیوۍ زۆرەملێ بێسەروشۆن کریان. ئی ئاژە بە پاشێلکاریێوە ڕۊشن و تنو مافەکا مرۆڤی منریۆرە. جە ٢٥ ئابو ساڵۊو ٢٠٢١یوە، ئیدریس فەقیهی جە کاتو جەنگێوە چەکڎارینە جە ما بەینو هێزەکاو سپاو پاسدارا و چەکڎارا نەشناسیای جە دەگاو عیلم ئابادی جە ناوچەو بوکانی، جە لایەنو هێزە ئەمنییەکاوە زامڎار و دماتەر باڵبەس مکریۆ.
دماو باڵبەسکەردەیش بنەیانەکەش جە یاگۍ و مەنزڵو دەسبەسەربیەیش ئاگاڎار نەکریێوە و حیچ مېیانێوەیچ ۋەرپرسیاری ئاژەکەیش جە ئەستۆ نەگرتەن. تەنانەت ڕۊشن نییا کە ئایا جە ژیواینە مەنەن یان نا. بەڵام بنەیانەکەش بەردەوام چی ماوەنە پەیوەندی بە مېیانە ئەمنی، حکومی و دادوەریەکاوە مکەرا، بەڵام هەمیشە حیچ جوابێوەشا بە ئەرێنی و نەرێنی نەدریانۆ.
سەرەڕاو ۋېیەرنای زیاڎ جە ٣ساڵا جە نادیاری چارەنوویسی، حیچ دۆسیێوە دادگای و حیچ قەرارێوە فەرمی یان قسێوە سەبارەت بە ئیدریس فەقیهی تەنانەت شۊنەماو گێرتەیش وەڵانەکریانۆ. ئی بێدەنگییە ڕەهایە نموونێوە ڕۊشنو بێسەروشۊن کەردەی زۆرەملێن، کە بە شێوازێوە سیستماتیک پەی دلېنەبەردەی تاکەکا جە ڕوو بەڎەنی و دەروونیوە ڕووەمڎۆ، ئینەیچ ئاژێوە کاولکەرش پەی بنەیانەی و کەسوکاریش وەشکەردەن.
بەپاو پێناسە مېیاننەتەوەییەکا، بێسەروشۊنکەردەی زۆرەملێ کاتێ ڕووە مڎۆ کە کەسێوە جە لایەنو هێزە دەوڵەتیەکاوە دەسبەسەر کریا بۆ، بڕفانیا بۆ، یان زینانی کریۆ و دماتەر چارەنوویس و یاگۍ زینانیش بە پەنهانی مەنۊوە. حکوومەتو ئێرانی بە مەڵامەتو کەڵک هۊرگێرتەی چی شێوازە کردەوە نایاساییا، فرەو وەختی جە لایەنو ڕێکوزیا جەهانییەکا مافو مرۆڤیوە ڕووبەڕوو ڕەخنەی تنی بیەنۆ.
