واتەواچەو ئەنجوومەنو ژەنا دەم پارتی خالیدە تورک ‌ئۆغلووە، پەرلەمانتارەو ئامەدی عەدالەت کایا، سەڤیلای چەلەنکە و شاندو یاوەریشا جە چوارچێوەو سەرۋنەدایەکا جەژنێنە چنی ئەڎایا ئاشتی جە ئامەد گلېرۍ بیێوە.

خالیدە تورک ‌ئۆغلووە ئەرەیاۋناش ئی پرۆسە پەی ئاشتی فرە گرنگا، بەڵام دۊڵەت یاگۍ متمانەی نییا و هەنگامېوە گولانێچش نەنیێنە، واتش: "هەڵبەتە مزانمۍ ئینە ڕاسی دۊڵەتیا. ڕاسی ئێمە ئینا ئەوەکۊشاینە، هەمیشە پەی گلېرگێوە دیموکراتیکی ئەوەکۊشێنمۍ. ئارۊیچ ئەوەکۊشایۍ گۊرە مکەرمۍ. پەنەوازا عالتەر کۊشش بکەرمۍ، ۋێما  بە ڕێکوستەی بکەرمۍ. حەچوەختۍ ڕێکوستەی گۊرەتەر بی، گلېرگەی دیموکراتیکیچ مېنە دی".

واتەواچەو ئەڎایا ئاشتی هاڤا کیرانە، ئەرەیاۋناش پەنەوازا باوەڕ بە ۋێما بکەرمۍ، چونکی ئی پرۆسە، پرۆسێوە ئاسایی نییا، واتش: "ئینە ئیتر دما دەرفەتا، ئەر ئی دەرفەتیە جە دەس بڎەیمۍ، سەڎ ساڵۍ دما گنمۍ. مشۊم گرڎ شانە بڎەیمۍ ۋەرو ئی باریە، مشۊم دەسو سەرۆک (ڕابەر ئاپۆ)ی بەهێز بکریۆ. بە ڕۆحی سەفەربەرییوە پەی گرڎ چێوۍ ئاماڎێنمۍ. گیانێوەما هەن، با ئاڎیچ فیداو ئاشتی بۆ. مشۊم ئی جەژنۍ بە ڕۆحی سەفەربەری ڕایی بکەرمۍ. پی سەفەربەرییە پرۆسەکە نەک هەر خێراتەر بۆ، بەڵکم سەرگنۆ".