کۆمیسیۆنو ڕەنجو دەم پارتی بانگەوازش پەی ۋەرفراوانکەردەی ئەوەکۊشای جە دژو فاشیزمی کەرد و واتش: "جە ئارۊو تورکیاینە ڕوحو ١٥-١٦و حوزەیرانی ڕاو کرێکارا ڕۊشن مەکەرۊوە. پا ڕووحیەتۆ درێژە بە ئەوەکۊشایما بڎەیمۍ دژ بە فاشیزمی، میتینگەری و فشارەکا."
پېوەس بە ساڵوەگەڕو مڎرامانەکا ١٥-١٦و حوزەیرانو ١٩٧٠و کرێکارا تورکیای کۆمیسیۆنو ڕەنجو دەم پارتی ئەرەیاۋنێوەش وەڵاکەرڎۆ و واتش: "مڎرامانی گۊرەو کرێکارا جە ١٥-١٦و حوزەیرانینە، بی بە یۆ جە بەرە تاریخیەکا کرێکارا جە تورکیانە و ئەوەکۊشایۍ کە پەی مافە دیموکراتیک، ماف و ئازادی سەندیکاکا دەسش پنەکەردەن."
دەم پارتی جە بەردەوامینە ئاماژەش پانەی کەرڎەن کە ٥٥ ساڵۍ سەرو مڎرامانو ١٥-١٦و حوزەیرانو کرێکارا تورکیایرە موېیەرۆ و بە ئیساتێچۆ مافە بنەڕەتییەکۍ کرێکارا پاشێلۍ مەکریا و واتش: "جە دژو سیستەمێوە کە دەنگو کرێکارا بێدەنگ مکەرۆ، مانگېرتەی قەڎەغە مەکەرۆ و سەندیکاکا بێ کاریگەر مەکەرۆ، پېوەرە ۋەرگیری جە یەکسانی، دادپەروەری، ئاشتی و ئازادی مەکەرمۍ."
کۆمیسیۆنو ڕەنجو دەم پارتی جەختش چی داوایا کەردەنۆ:
*پەنەوازا ڕاگیریەکۍ ۋەردەمو ڕێکوستەبیەی سەندیکایی و مافو مانگېرتەی لابریا و ورسپارنای مانگېرتەی و فشاری دمایش پنەبۍ.
*کەمتەرین مووچە جە ئاستو ژیۋای ئا مرۆڤانە بۆ، لاو کەمیۆ نیمەو هێڵۊو هەژاری بۆ، و هەر ٣ مانگ جارێوە بەپاو گرانبیەی ڕێکوزیۆ.
*پەنەوازا بە ڕەخسنای ئاژەو سڵامەتی و تەندرووسی کرێکارا ڕاگیری جە مەردەی کرێکارا و ئەنجامدای هەرمانەو مەترسی گیریۆنە.
*پەنەوازا جیاکەردەیۆ ۋەروەڵاو ژەنا و جوانا و کرێکارا کۆچبەری نەمەنۆ؛ مشۊم مافو مووچەی یەکسان و هەرمانکەردەی سڵامەتی پەی گرڎ کەسی دڎانش پۊر بنریۆ.
جە دمادمایی ئەرەیاۋناکەینە کۆمیسیۆنو ڕەنجو دەم پارتی بانگەوازش پەی ئەوەکۊشای جە دژو فاشیزمی و چەوەسنایۆ کەردەن و ماچۆ: " ڕۆحو ١٥-١٦و حوزەیرانی تا ئارۊیچ ڕا پەی کرێکارا جە تورکیانە ڕۊشن مەکەرۊوە. ئێمە پېسە کرێکارا و ژەنا و جوانا ئی وڵاتیە دەسەڵاتو ئانەیما هەن کە جە ڕاو کۊششێوە هامبەشیوە پېوەرە ئی سیستەمەیە فاڕمۍ."
