حەسەن زازا ئەندامی یەکێتی راگەیاندنی ئازاد و نوێنەری فیدراسیۆنی نێونەتەوەیی ڕاگەیاندنی عەرەبی سوریا لەلایەن هێزەکانی حکومەتی کاتیی سوریاوە دەستبەسەر کرا.

یەکێتی ڕاگەیاندنی ئازاد(یەرەئا) لە بەیاننامەیەکدا ڕایگەیاند، هێزەکانی ئاسایشی حکومەتی کاتی سوریا، حەسەن زازا، ئەندامی ئەنجومەنی گشتی یەکێتییەکە و نوێنەری فیدراسیۆنی نێونەتەوەی راگەیاندنی عەرەبی سوریا دەستبەسەر کردووە. لە ڕاگەیەندراوەکەدا هاتووە، مامۆستا و ڕۆژنامەنووس حەسەن زازا لە ماڵەکەی خۆی دەستبەسەر کراوە و بۆ شوێنێکی نادیار گواستراوەتەوە. هەروەها ئاماژە بەوەشکراوە، هۆکاری دەستبەسەرکردنەکەی ئاشکرا نەکراوە.

یەرەئا دەستبەسەرکردنی ڕۆژنامەنووس حەسەن زازای ئیدانە کرد و داوای لە لایەنە پەیوەندیدارەکانی ناو حکومەتی کاتی سوریا کرد کە دەستبەجێ حەسەن زازا ئازاد بکەن و بەرپرسیارێتی خۆیان لە پاراستنی ڕۆژنامەنووسان جێبەجێ بکەن و دۆخێکی ئارام و گونجاو بۆ خەباتی ڕۆژنامەنووسان دابین بکەن.

یەرەئا لە کۆتاییدا پشتگیری خۆی بۆ هەموو ڕۆژنامەنووسان کە ڕووبەڕووی پێشێلکاری و ئاستەنگی دەبنەوە دووپات کردەوە.